طريقه عمل محشى الكرنب خطوه بخطوه بالصور

• كرنبه 
• زيت او سمنه 
• بصل مفروم 
• ثوم مفروم 
• عصير طماطم 
• ملعقه كبيره صلصه طماطم 
• ارز 
• شبت وكسبره وبقدونس مغسول ومقطع بالسكينه 
• ملح وفلفل اسود 
• كمون 
• كسبره ناشفه 
• بهارات مشكله 

1. شيلى الورق الاخضر اللى على الكرنبه من بره 
2. فصصى الكرنبه بالسكينه ورقه ورقه 
3. اشطفى الورق كويس بالميه 

1. حطى حله على النار فيها مايه ومعلقه ملح ومعلقه كمون وسيبيها تغلى 
2. نزلى ورق الكرنب فى الميه المغليه بحيث يوصل لنص سوا 
3. شيلى الورق من الميه المغليه واشطفيه بميه من الحنفيه تانى 
4. بعد متخلصى سلق كل الورق قطعى الورق لقطع بحيث تكون كل قطعه على اد صوباع المحشى 

1. فى حله على النار حطى زيت او سمنه ولما يسخنوا كويس حطى البصل  لحد ما يدبل ويصفر 
2. انزلى بالطماطم المعصوره والمتصفيه وقلبى كويس 
3. ضيفى صلصه الطماطم والبهارات والملح والفلفل والكمون والكسبره 
4. سيبهم يتسبكوا كويس لحد ما الزيت يظهر على وش التسبيكه 
5. بعد ما تتسبك كويس شيليها من على النار وضيفى لها الارز المغسول والمتصفى  واخلطيهم كويس
6. ضيفى لهم الشبت والكسبره والبقدونس واخلطى وهنا تبقى الخلطه جاهزة للحشو 

1. حضرى الحله اللى هتحشيى فيها ورصى فيها شرايح بصل وطماطم وفلفل بيدوا طعم جنان للمحشى 
2. خدى ورقه من ورق الكرنب اللى مقطعينه وحطى على طرفها معلقه صغيره من خلطه المحشى 
3. لفى الورقه على الخلطه كويس عشان الحشوة متخرجش منها واحنا بنسويه 
4. رصى صوباع المحشى فى الحله وكررى العمليه لحد متخلصى كل الكميه 

1. نحضر الشوربه اللى هنسقى بيها المحشى سواء شوربه لحمه او فراخ او بط
   ولو مفيش شوربه يبقى مايه مغليه فيها ملح وفلفل وبهارات ومرقه دجاج 
2. حطى الشوربه او المايه المغليه على المحشى بحيث متغطيش وش المحشى بالشوربه اووى يكون لحد اخر سطر بالضبط 
3. سيبى المحشى على نار عاليه لحد ما يغلى ويتكتك وبعدين وطى النار عشان يستوى براحته لمده 45 دقيقه 
4. اتاكدى من ان المحشى استوى بانك تاخدى صوباع وتشوفى الرز جواه استوى كويس ولا لسه 
5. قدمى المحشى سخن والبخار طالع منه وبالف هناااا

https://m.janatna.com