ملف شامل عن طريقه عمل التورته تورته فاكهه وتورته شوكولاته خطوة بخطوه مع طريقه عمل الكيكه الاسفنجيه
اولا طريقه عمل الكيكه الاسفنجيه بالدقيق العادى
المكونات
- كوب الا ربع سكر
- كوب ونصف دقيق عادى
- 5 بيض
- رشه ملح
- نص معلقه فانيلا صغيره
- معلقه كبيره من البيكنج بودر
طريقه عمل الكيكه الاسفنجيه بالدقيق العادى
- نبطن صنيه خبز الكيكه بالزيت ورشه دقيق ونسيبها على جنب
- هننخل الدقيق والبيكنج بودر ورشه الملح 3 مرات لان دا بيساعد ان الكيكه تبقي عاليه جدا ومتهبطش ونركنهم على جمب
- بالمضرب الكهربا هنضرب البيض والفانيلا لمده 10 دقايق مع فصل المضرب على فترات عشان ميتحرقش لحد ما البيض حجمه يزيد للضعف
- هنبدا نضيف السكر تدريجى مع الاستمرار فى الخفق لحد ما نخلص كل كميه السكر والخليط حجم يزيد للضعف
- فى الخطوه دى هنبدا نضيف الدقيق المنخول
على مراحل ونقلب بحرص عشان منخرجش الهوا من الكيكه وتبقى عاليه وهشه لحد ما
نخلص كل كميه الدقيق ويختفى خالص - هنصب خليط الكيك دا فى الصنيه وندخلها فرن سخن لمده ساعه الاربع على درجه حراره 180
- منفتحش الفرن نهائى الا بعد مرور نصف ساعه لان دا هيخلى الكيكه تهبط
- نختبر الكيكه بطرف سكينه ولو استوت نطفى الفرن ونسيبها جواه 5 دقايق
- بعد كده هنخرج الكيكه ونسيبها تبرد تماما ونبدا نقسمها طبقات عشان نحشيها ونزينها .
ثانيا طريقه عمل الكيكه الاسفنجيه بدقيق الاسبونج الجاهز
المكونات
- 6 بيض بدرجه حراره المطبخ
- نصف كيلو دقيق اسبونج
- نصف كوبايه مايه دافيه
- معلقه كبيره محسن جل
- رشه فانيلا
خطوات عمل الكيكه الاسفنجيه بدقيق الاسبونج الجاهز
- هنضرب الفانيلا مع البيض بالمضرب الكهربا 10 دقايق لحد ما حجم البيض يوصل للضعف
- هنضيف المايه الدافيه والمحسن الجل ونكمل ضرب بالمضرب
- هننزل بدقيق الاسبونج الجاهز ونفضل نضرب الخليط 10 دقايق كمان
- هنصب الخليط فى صنيه مبطنه بدهنه زيت ورشه دقيق
- ندخل الصنيه فرن سخن لمده ساعه الا ربع وممنوع نفتح عليها الفرن قبل نصف ساعه عشان ممكن كده تهبط
- نختبر الكيكه بخله او سكينه ولو استوت نطفى الفرن ونسيبها جواه شويه عشان متهبطش
- نسيب الكيكه تبرد تماما ونبدا نقسمها طبقات للتزين
طريقه عمل التورته وطريق تزينها
لعمل التورته نحتاج الى
- كيكه اسفنجيه وشرحنا فوق هنعملها ازاى
- كريم شانتيه
- صوص شيكولاته
- فاكهه مقطعه للتزين
- جيلى تلميع
لعمل الكريم شانتيه
- ربع كيلو كريم شانتيه خام
- كوبايه لبن مثلج
- 4 معالق سكر بودره
هنضرب كل المكونات مع بعض لحد منحصل على كريم شانتيه متماسك
لعمل صوص الشيكولاته للتزين
- مكعبات شيكولاته خام
- 3 معالق زيت كبار
- 3 معالق لبن
هنسيح الشيكولاته على حمام بخار ونضيف لها الحليب والزيت لحد ما نحصل على صوص شيكولاته لامع جدا
طريقه عمل التورته وتزينها
- هنقسم الكيكه لطبقات
- هنسقى الكيكه بعصير خفيف
- هنحط اول طبقه للكيكه ونفرد عليها الكريم شانتيه
- نحط طبقه كيكه تانيه عليها ونكرر نفس العمليه لحد ما نخلص كل طبقات الكيك
- نغلف الكيكه بالكريم شانتيه من الوش ومن الجوانب
- نصب عليها صوص الشيكولاته بعد ما يبرد
- ممكن نزود شرايح فاكهه او شيكولاته فارمسيلا او شيكولاته احجار للتزين
https://m.janatna.com
