إتعرفت بعشقها للفن، وكمان جرائتها في
جميع أدوارها ومَش بس كده كمان جرائتها في تصريحاتها اللي دايمًا بتوقعها
في مشاكل ودفاعها المستميت عن الفن، وقدرت تجذب ليها الأنظار في كل
المناسبات بذوقها الأنيق، هى الفنانة الجميلة “إلهام شاهين”
إسمها
بالكامل إلهام السيد أحمد شاهين، اتولدت في مصر الجديدة يوم 3 يناير سنة
1960، فهى من عائلة فنية، وأخوها الصغير هو الفنان أمير شاهين وأختها مصممة
الأزياء إيناس شاهين.
وأثناء دراستها في مدرسة نوتردام للغات،
اعتمدت عليها ادارة المدرسة لتقديم حفلاتها منهم حفلات راس السنة الميلادية
وعيد الأم وده كان بسبب ذكائها وخفة ظلها، وكانت إلهام سعيدة بتميزها بين
اصدقائها، وكانت بتغني الاغاني الوطنية اللي اتدربت عليها لباقي افراد
أسرتها ومن هنا ظهرت عليها البوادر الفنية.
ولما أنهت دراستها
الثانوية قررت انها تدخل معهد الفنون المسرحية، لكن قرارها كان بدون علم
والدها فهو كان عايزها تدخل كلية الطب، وبالفعل قدمت فى المعهد ونجحت بتفوق
في الاختبارات، ولكن كانت العقبة الوحيدة في طريقها هى عدم علم والدها.
فحكت
عن مشكلتها للمخرج المسرحي الكبير كمال ياسين وهو كان استاذ بالمعهد،
فوعدها انه هيساعدها وفعلا قدر يقنع والدها انه مايقفش في طريق مستقبلها
طالما انها اختارته ومؤمنة به، ومن وقتها بدأت رحلتها الدراسية في المعهد
بدون عقبات.
وأثناء دراستها وبالتحديد سنة 1977 كانت في أحد
الحفلات والفنانة الراحلة “فاتن حمامة” موجودة وبعد انتهاء الحفلة راحتلها
الهام علشان تسلم عليها، وكانت المفاجأة ان فاتن حمامة قالتلها إنها شبها
أكثر من بنتها، وإن صوتها كمان قريب منها.
وبعد الحفل بأيام بسيطة،
قررت الإعلامية أماني ناشد مقدمة برنامج “كاميرا 9” في التلفزيون المصري،
عمل لقاء مع الهام شاهين تحت عنوان “شبيهة فاتن حمامة”، ومن هنا بدأ مولدها
الفني وهى في الفرقة الأولى بمعهد الفنون المسرحية.
وكانت بدايتها
مع الفنان حسين الشربيني في مسرحية “حورية من المريخ” سنة 1978 ، وبعدها
أصبحت وجه سينمائي جديد في أفلام “رجل اسمه عباس” و”تحقيق”.
وإنتقالا لحياتها الخاصة
فتزوجت
في حياتها مرتين لكن كان ليها قصة حب أثناء دراستها في معهد الفنون
المسرحية، من “وجدي العربي”، وتمت خطبتهم لفترة وقبل زواجهم انتهت علاقتهم
بالفشل وصرحت وقتها أن والدها هو اللي وقف في طريق زواجهم.
وبعد
سنوات وهى في أحد المؤتمرات اتعرفت على رجل الأعمال “عادل حسني” وكان اكبر
منها ب 25 سنة، فتزوجوا وبعد زواجهم ب5 سنوات بدأت بينهم الخلافات بسبب
رغبته أنها تسيب الفن، ولما تفاجئت انه دخل لعالم الإنتاج الفني، اصرت على
الطلاق.
أما زواجها الثاني فكان في السر من رجل الأعمال اللبناني
“عزت قدورة”، اللي وافق أن العصمة تكون في ايديها، وبعد سنتين من زواجهم
طلقته الهام عبر الهاتف بسبب رفضه إعلان زواجهم، وده جعله يفكر انه ينتقم
منها أثناء وجودها في لبنان، فأجر سائق يرمي عليها ماية نار.
وبسبب
فشلها في حياتها الزوجية، اضطرت أنها تلجأ للأجهاض مرتين، واعترفت بده خلال
لقائها مع راغدة شلهوب في برنامج “100 سؤال” لما قالت انها “اخدت قرار
الإجهاض بسبب شعورها بالفشل في زواجها لمرتين وبسبب وجود كتير من المشاكل
والخلافات في حياتها، فقررت انها ماتحيبش اطفال علشان مايتعرضوش للظلم في
المستقبل بسبب زواج فاشل”.
وعن علاقتها بعادل امام قالت “شاهين” أن
آخر عمل ليها مع عادل إمام كان فيلم “رمضان فوق البركان”، وأضافت ان عادل
إمام صاحب فضل كبير عليها، وهو اللي عرض عليها تشتغل معاه في فيلم
“الهلفوت” وده يعتبر بداية نجوميتها، والدور في الأول كان مكتوب لنجمة
كبيرة، وأكدت إن لو عادل إمام طلبها في دور بسيط حتى مش بطولة هتوافق على
طول”.
وكشفت عن علاقتها بوالدها وانهم مكانوش بيتفقوا دايما لانه
كان راسم حياتها بطريقة هى مش عايزاها ودايما بيقول الدكتورة الهام، وبسبب
الفن قعدوا فترة طويلة مَش بيتكلموا، لكن هى مكانتش قاسية عليه حسب تصريحها
وقبل وفاته راحتله وصالحته حتى انه توفى أمامها.
https://m.janatna.com
